Kitabın xüsusiyyətləri

Təsvir

Azərbaycanın görkəmli ictimai-siyasi xadimi və mühacirət ədəbiyyatının ən parlaq nümayəndələrindən biri Məhəmməd Əmin Rəsulzadənin “Azərbaycan şairi Nizami” monoqrafiyası nizamişünaslığın ən dəyərli əsərlərindən biridir. 1941-ci ildə qələmə alınmış bu əsər 1951-ci ildə Ankarada Milli Təhsil Nəşriyyatında çap olunub. Azərbaycanda isə ilk dəfə 1991-ci ildə pr.dr. Rüstəm Əliyevin ixtisarı ilə kiril qrafikasında nəşr edilib. Bu nəşr orijinal mətnlə müqayisə olunaraq Əvəz Qurbanlının redaktəsi ilə hazırlanıb. Monoqrafiya başlanğıc, dörd fəsil, son söz və əlavələrdən ibarətdir. Birinci fəsildə “Nizami kimdir?” sualına cavab verilir, ikinci fəsildə böyük şairin “Xəmsə”si tədqiq olunur, üçüncü fəsildə Nizaminin mövzuları araşdırılır, dördüncü fəsildə isə onun irsində sənət və ideologiya məsələləri dərin təhlil edilir. Kitabın sonunda Nizaminin əsərlərində işlənmiş türk sözlərinin lüğəti də yer alır. Bu kitab Nizami Gəncəvinin 880 illiyinə həsr olunub və geniş oxucu kütləsi üçün nəzərdə tutulub.